唔知道鍾意揸電單車o既仁兄，又鍾唔鍾意睇 Moto GP 呢？其實近幾年o既Moto GP已經好少埋身肉搏，老實講有時真係覺得有D悶；我o地呢個網，主要係講「玩」，所以有關賽事o既過程，我o地唔打算再重覆，我諗你o地都睇咗掛，如果未睇，自然會搵重播睇，唔係o既話就係完全無興趣睇；所以，我o地反而希望同大家分享一D賽事以外o既有趣事。

2011 Motogp 日本茂木站精華

大災難日
賽事前o既星期六晚，「無記」播o左秋官同亞姐o既演唱會，估唔到秋官效應真係咁勁，寫稿o既時候，股市大跌七百幾點，係咪大災難？

香港呢邊大股災，早一日就係車迷、羅絲同埋Ducati o既大災難，因為羅絲淨係跑o左兩隻......彎，冇錯，Only 2 corners，就炒低咗；重諗住佢排位唔錯，場賽事會有D睇頭，唉.......跟住Hayden又犯錯，最後淨係得第8，真係Ducati o既災難日。

一面天堂、一面地獄
冇錯，係一面天堂、一面地獄；唔係一念天堂、一念地獄，點解？ Moto GP呢邊Ducat就大災難，但另一邊World Superbike(WSBK)o既積加(Carlos Checa)就幫Ducati 重拾o左失去兩年o既世冠寶座，更諷刺o既係呢支唔算係廠隊，因為Ducati將所有o既資源分配，都因為羅絲o既高價加盟而被迫切斷，連一向有好表現o既World Superbike廠隊都被迫收旗；不過，世事往往出人意表o既，替亞爸爭番面子o既反而係呢個二奶仔！而家只寄望羅絲下年真係可以重振自己同埋Ducati o既雄風，若然唔係o既話.........
唔敢想像啊！

堅持到底和天意弄人
講番擁有18年國際頂級賽車生涯o既積加，終於到o左37歲之年先攞到個人第一個世界冠軍，梗係恭喜佢啦，佢重比o左唔少啟示我哋：老生常談，機會總係留比有準備o既人，你有準備，又有自信、肯堅持，當然重要有D運氣，咁一旦時來運到，即係Right time and right place，咁你就得架啦！

點解咁講，因為羅絲對佢o既炒車大災難，只係輕描淡寫咁總結：Wrong time and wrong place，所以咪炒o左囉，以廣東話傳神D講，就係「天意」.......

我唔能夠發達，都係Wrong time and wrong place；我做唔倒特首，又係Wrong time and wrong place；至攞命係連我老婆都話嫁比我，係Wrong time and wrong place呢..........

十個救火的少年
支持日本－有人捐獻，有人去日本旅行；你點支持呢？

幾個月前已經有人問羅倫素(Lorenzo)會唔會鬥日本站，佢死人都話唔去，話驚影響生仔；跟住史東拿又話唔去！唉，你又話支持日本，部戰車都貼哂標語，點知原來係空談，都幾似我o地個政府，得把口講！年青人就係年青人，你睇睇羅絲，只會答：「睇下點、睇下點」，幾有政治智慧。其實佢o地又唔使咁早表態啫；好彩最後份報告出咗，証實安全，咁眾位大哥先肯過日本比賽。

但係就有D車隊，包括Moto 2安祖利絲o個隊，就只有車手去，成班工程人員都唔到，咁都得？結果呢隊車隊就要請日本當地o既技師，臨時拉伕囉！

都係嗰句，使唔使驚成咁，咁人o地當地D日本人咪要走佬至得！唔該佢哋睇下我o地香港D藝人，早幾個月前已經由曾志偉帶埋一班藝人到大板拍掌門人，雖則話有錢收、又話大板較遠離福島，但都算係一個實際支持o既舉動。

不過，從企業管理陰謀論計，我會有以下想法：話唔定有車隊諗，反正全球經濟不景，贊助費緊縮，咁不如學下活化管理，唔請全職，改為去聘請當地技師，咁樣可以慳番D機票同酒店錢，睇怕成年都慳番唔少！

下一頁＝柏杜莎賽後記者招待會(中文字幕)