唉，今日終於可以去大偈間車行度拎返自己部Yamaha 4V，呢部車差D搞到我英名盡喪，仲有身心透支，如果晨早聽老友講，正正經經去搵間靠得往車行去整，就唔駛攪到好似而家咁，真係應驗老媽話：「早知今日又何必當初？」

講左咁耐都未介紹自己，我叫阿強，認識我既朋友大多叫我「傻強」，我自問生得英明神武，話之你點睇我，反正我喜歡我行我素，總之唔駛同其他人交代就得喇。

現年三十有三既我，中學畢業後就出黎社會做事，到目前為止只打過兩份工，第一份就係去「大家樂」做見習經理，返工後先知道原來係咁難頂，真係辛苦到無朋友。老媽見我成個人瘦晒，就叫我轉行，幾經朋友介紹之下，就去左一個會所裡面做個小小客戶服務員。或者上司見我個樣醒，加上又無乜機心，佢就成日同我講將來退休之後，呢個經理位就留返比我，點不知一做已經十二年，係呢段時間裡面，我就由最低層職員升職為資深客戶服務員，總算對老媽有個交待。

講番我呢間公司，無論你做得好與唔好，公司都唔會炒你，因為係呢十二年裡面，公司由全盛時期既十個人變成而家只有四個人，分別係；經理、我、清潔阿姐，同埋岩岩入職既小妹妹－Fanny。遇上清潔阿姐放假，我就要兼埋清潔，仲連廁所都要洗埋，經理見我好駛好用，點捨得炒我喎。

或者係份工做得太耐之故，加上我份人又無乜上進心，久而久之就養成得過且過既性格。我呢份工係需要輪班，經理話Fanny唔想返夜，叫我體諒小妹妹，反正我每日放工都係無所事事，又無女朋友拍拖，於是安然接受任命。

雖然我已經三十幾歲人，仲係N無人士，無樓、無老婆及無錢。但有一件事令我自豪，就係有車，一部電單車，勁掛？

或者你地會問點解我會考個電單車牌？答案好簡單，就係貪佢有型，兩年前見到舊同學阿昌開住部烈火戰車不之幾型，於是激發我心中呢團火，一次pass之後，我就買左人生第一部電單車（二手車）－大鷹皇200。

正一「草泥馬」

(備注：「草泥馬」何解呢？大家唔好誤會以為係一隻由稻草加泥土再編織而成的馬類。根據內地文化乃為粗俗之髒話，「草泥馬」乃「操你媽」之變種文化。所以下次見到國內朋友，千萬唔好問佢何謂草泥馬喇，886。)

老媽經常話電單車好危險，話好容易無左我呢個仔，但我認為只要有良好安全駕駛意識，凡事忍讓就應該唔會有問題掛！可惜部車買左幾個月就玩完，大家唔好誤會我炒車，而係比間PK車行唔記得幫我入偈油，搞到副引擎自動報銷，草泥馬！

之後經朋友介紹認識左好多車友，又認識左肥仔大偈（本人的現任死黨兼老友），先知道我上次整車間車行係黑店，應該係超級PK黑店先真！

經過呢次教訓之後，我又買過第二部車，今次聽惠友阿昌講，實行買部穩穩陣陣既街車，CB 400 Super Four是也。部超四玩左一輪之後，我就發現部車無病無痛，再聽朋友意見話電單車要作出定期維修，例如換機油等等，再經過上次「大鷹皇」事件之後，我實行去車行偷師，見肥仔大偈點做，自己照板煮碗，一年多D時間裡面，部車大部份既維修都係自己DIY，空閒之時自己就上網參考其他網友意見，到目前為止我已經有相當經驗，就快變專家，嘿嘿！

「草泥馬」2－等到發傻

最近有車友放售Yamaha 4V自動羊，加上我個人好鍾意呢款車，而且價錢都算幾筍，二話不說就買多部車，哈哈，爽呀！

辦好過戶之後，隨之而來既當然係搞下部車，講真我對電單車都有無限要求，可惜金錢有限，正因為咁樣，呢部4V既換偈油、火咀及風格等工作當然要親力親為。一切既工作完事後，我就正式進行道路測試，經過幾次反覆測試之後，我發覺部車既波子盆好似唔多暢順，心諗呢次大鑊，買錯賊車，早知聽肥仔大偈話比佢望下先就唔會領野。為左呢件事，仲搞到成晚都瞓唔著，第二朝發現個眼袋黑晒，仲成隻熊貓咁，比Fanny見到就尷尬死，好在今日我例假，咁都無咁驚。

原本我想打電話比肥仔大偈問佢意見，但又怕佢老細收得我貴，不如求求其其去搵其他車行整好過，加上最近輸左馬仔，實行慳得就慳。下午我開住部車係九龍某處見到間車行，見個老細又鬼咁好傾，加上間車行又無乜點，又唔似黑店，於是就將部4V放低比佢整，今次我醒目，只係叫佢換套波子盆，其餘D乜都唔駛搞。

等下一日，等下又一日，終於等左個幾禮拜，車行老細打電話比我，話我部車好多問題，如果全部搞好要接近三仟蚊，我聽完之後呆左，心諗換套波子盆駛唔駛咁嚴重呀？ 

「草泥馬」3－俾人「兇」 

第二日我特登同經理講話老媽有事要我請假陪佢，然後就飛奔過九龍間車行了解。去到見到自己部車原封不動，好似乜都無整過咁，呢個時間車行老細同我講，話我部車個電點壞左，又話皮帶同普利盆都要換，又講東又講西，嚇到我死死下，我無計可施既情況下，終於打電話比肥仔大偈。

肥仔大偈教我拿拿臨開部車走，因為呢間車行完全唔老實。跟手我同老細講，話部車情況咁嚴重，都係唔整算。點不知呢個老細聽完我講之後，立刻表演四川變面特技，由原來仁慈既面口變為惡形惡相，話如果而家拎部車，都要俾檢查費$500蚊！
 

破財擋災，全身而退，呢個道理我明白，比錢之後我就準備撻車走人，點不知部車撻極都唔著。我問老細點解，佢話部車係壞，當然撻唔著喇！算啦，無謂用佢爭拗，明明部車係揸黎車行，到家陣點會撻唔著呢？唯有叫部拖車算，又唔見錢，唉！

到左肥仔大偈間車行之後，見佢快手快腳用左十分鐘就幫我撻著部車，然後再出去試車。呢個時候我個肚鬼咁餓，去醫肚先。

食完飯返黎之後，見肥仔大偈已經試車返來，仲將部份車身零件拆除，過去問部車發生乜野事，佢話部車根本就無事，只不過之前間車行響電點插頭做左手腳，仲將電點插頭鬆脫，所以先會撻唔著。其次就係波子盆問題，部4V既波子盆跟本唔算嚴重，只要換過D鋼珠就可以，只不過而家無貨，要過兩日先搞得掂，屬於Easy job。

今日終於去拎返部4V，見到肥仔大偈已經將部車整好，仲幫我洗乾淨部車添，之後我問佢部車既普利盆等等正唔正常？

肥仔笑笑口話，如果你錢多的話我亦唔介意幫你換埋佢，我聽完之後嬲到暈，真係估唔到我傻強又一次比人老點，好在有個好朋友肥仔大偈，佢又幫我一次，至於整左幾多錢？總之就係抵到你唔信，老友價呀，肥仔大偈，下次飲茶我嘅！

(全段完)－至於下次傻強又遇到咩野奇難雜症需要肥仔大偈出手呢？請留意本誌「大偈與傻強」連續劇。

返回首頁