2011 Motogp澳洲站精華

好忙好忙
點解咁忙？因為全球三大賽車賽事都是在今天(10月16日)舉行，包括 F1、 MotoGP 同埋 World Superbike；晨早一起身，就有MotoGP睇，緊接而黎就係F1，但我約了家人嘆茶，唯有錄起佢遲啲睇；果日你懶出街，又睇完F1冇耐，到左六點半又有World Superbike 轉播，如果你三大賽事都睇哂，真係重忙過美國總統呢！

其實F1 同Superbike都已經冇乜懸念，因為世界冠軍都已經有咗；輪到MotoGP，史東拿封王我相信都係遲早既問題；不過，今季賽事就快完，車迷本住有得睇好睇既精神，真係好容易就坐響電視機前面坐足成日呢！

 Repsol Honda－史東拿封皇

原來真係有.....念力......
MotoGP來到澳洲站，大家都知道地頭龍史東拿應該贏梗，唯一問題係有冇機會喺呢站封王；史生佢自己就話機會渺茫，因為羅倫素始終有一定實力，佢一日霸住個第二、重攞到分，史東拿都重未可以封王！當然大家都知道羅倫素諗乜，佢始終想搏一搏，唔係搏佢可以反勝，而係摶史東拿壞車或勁炒，三站都冇分....雖然可能性低啲，但世事既嘢.....

冇錯，世事既嘢.....又點比你估倒吖，老實講，我都幾欣賞羅倫素份鬥心，但調番轉講，人家史東拿今站之前已經贏咗八個分站冠軍，今次仲返到自己家鄉，撞正果日又係自己生日，如果能夠加埋個登基封皇，響全國鄉親父老面前威下，實在係理想不過，真係舉國歡騰。

你呀....羅倫素係咪好應該諗下成人之美呢！當然，講下笑就得，比我都唔肯啦，但係我就相信百分之九十九嘅澳洲人，都會有以下既想法：羅生，你最好唔好阻住亞史生響家鄉度封王啦......!

悲劇既事情就發生左：本來冇乜可能既事，真係可以發生！我唔知大家信唔信有念力，即係話集合好多好多人既意念，竟然可以促成某D事情發生或改變。雖然我未真正見過，但今次澳洲GP既巧合（或怪事），似乎只可以用念力解釋。

話說羅倫素排位賽拿個第二，除左史東拿響佢前面之外，羅生仍然係力壓所有本田車手。照形勢黎睇，佢既成績應該好可能跑第二，咁樣，史東拿最快都要下一站先可以封王。
 

在此祝願羅倫素早日康復，為Yamaha再次披上戰衣作賽

大災難日，again！！
一向都快得嚟又頗穩定嘅羅倫素，估唔到佢會響正賽日既熱身環節裡面炒車，重要炒到左手隻無名指無咗一節，睇相都幾恐怖，隻手指短咗好多呀.....

剛剛上站先話亞羅生冇「咭士」，初時唔敢去日本；但睇完幅相，發覺亞羅生都係硬漢一名，企響佢隔離嗰位亞嬸好似重驚過佢！我就諗，其實係咪斷手指唔係幾痛嘅呢，定係羅生腎上線仍然超高，起到鎮痛作用！點講都睇，每次睇賽車最唔想見到既就係炒車場面。

就咁樣亞羅生就唔駛出賽了；據說下站馬來西亞都唔出得喎！咁邊個最開心？我唔敢講，因為將自己嘅快樂建築響人家的痛苦上係唔啱既！而畫面就見到呀史東拿立刻去慰問羅倫素（定係去多謝佢成人之美，然後順路叫自己D工作人員準備慶祝呢....）！而正在舉行的馬來西亞站，將會由日藉Yamaha廠隊試車手－中須賀克頂替羅倫素位置。

更加禍不單行係另一Yamaha廠手Ben Spies響早一日排位賽時炒車撞親個頭，到第二日仍wing wing 地，唔可以比賽；就咁樣，Yamaha就一架廠車都出唔倒，全軍覆沒！超級大災難。

史畢斯在練習賽時發生跌車片段

Ducati......（運氣指數低低地）
唔係話佢哋個腦，係指佢哋嘅運氣指數！話說希頓(Hayden)起跑竟跑第二，撐左幾個圈，跟住後胎就話開始冇grip(咬地)，然後就慢慢墮後！至於羅絲.....唉.....！

其實從週五練習賽開始，羅絲就從未快過，練習賽後既訪問，佢好大方怪罪自己，同傳媒講：「對不起，我真的很慢」。也頗有大將之風。到正賽既時候，中段時佢開始追近希頓(Hayden) 和巴迪斯達(Bautista捌弟)。誰知一發力過捌弟，就即刻炒車，是第二場連炒了！

羅絲超越巴迪斯達後跌車片段

Ducati份頭係咪真係有問題呢？畫面見佢哋入灣真係冇咁靈活；或者好似羅絲咁，若然不顧一切就會炒車收場呢！羅絲自己似乎都好心灰，同D記者講，今年佢要贏車，落雨都唔夠，睇怕要落雪至得。雪就落唔成啦，但係佢哋既運氣就真係低低哋，雪上加霜就有份。

Suzuki的巴迪斯達下雨時跌車 

最後講講今場車，有邊幾個車手最有觀賞性，我會揀捌弟同埋Moto 2 既 Marquez，同埋捌弟支一人車隊(Suzuki)，差D有機砌低支Ducati廠隊，而且跑起上嚟，同第二集團既距離已經拉近咗，但好可惜最後都炒車。捌弟都仲係欠一點火喉！

至於Marquez，都可以用大愚若智來形容佢。話說第二節練習賽時，佢已經過咗格仔旗，但唔知抽起邊條筋，仲想做多個快圈，咁就響直路尾撞咗落已經收咗韁既泰國車手Wilairot度，重攪到人家出唔到賽，仲訓響醫院度。咁賽會就話佢既行為不負責任，揮左旗重鍊，搏乜嘢！所以就罰佢排位成績加一分鐘，即係響包尾出發啦！

不過，Marquez超班就真係超班，一路比佢逢車過車，最後竟攞到第三；其實佢就算唔被罰，本來都可能只係攞到第三，但佢咁搞，就無端端益咗我哋啲觀眾睇多啲過車場面，正！其實諗諗下，叫D前列車手由包尾起步，場賽事好似重好睇啲喎！

Moto2的Marquez與泰國車手Ratthapark Wilairot(港人熟識稱為聖誕樹著名前泰國車手的兒子)

 
咁佢?又有乜講？What did they say?

Crutchlow

Dovizioso

Bautista

Pedrosa

Simoncelli

Stoner

Rossi

Racing Girls

(全段完)－返回主頁